Aguas blancas uruguay
Þessi á er í suðurhluta Úrúgvæ ekki langt frá höfuðborginni og á þessu svæði sem við veiðum er tjaldsvæði og þjónusta við það svo möguleiki á að næla sér í ís þegar hitinn er sem mestur
Smá stífla er í ánni og er þar fyrir ofan er lón sem gestir á tjaldsvæðinu nota til að synda og leika sér þegar heitt er í veðri, innfellda myndin er af blóðsugu sem maður finnur af og til á löppunum á sér Ég slapp alveg í þessari ferð og þetta var sú eina sem ég lét sjá sig í ferðinni, eina sem er vont við þessar blóðsugur er að manni getur brugðið þegar maður finnur þessar hlaupklessur hingað og þangað á löppunum og skiftir þá litlu hvort hún er einn eða tíu sentimetrar
Fyrir neðan stífluna var smá straumur og grjót sem eru bestu aðstæður til að finna Ancistrus, og á myndinni er Felipe að þukla undir steina hvort hann verði var við eitthvað líf en oftast er hægt að koma við Ancistrus án þess að þær fari af steininum, og ef maður finnur hreyfingu þá er bara að lyfta steininum hægt upp og háf undir og Ancistrus dettur ofaní háfinn
Guldoppótt litarafbrigði af Ancistrus finnst í þessari á og sést hrygna á innfelldu myndinni, hængarnir eru frekar breiðir en með litlan brúsk á nefinu
Ofan á stíflunni er fínt að veiða á stöng og er Pedro þarna að dorga ásamt krökkunum hans Felipe, en í raun eru þau að dorga í sundlauginni þar sem búið er að girða þennan hluta af og setja stiga niður af stíflunni
Gymnogeophagus gymnogenys hængur sem kom í kastnetið
Einnig komu nokkrir Gymnogeophagus terrapurpura á land, þessi er óvenju litlítill miðað við þessa tegund
Ekki góð mynd en fjórar Barracuda komu í einu kasti sem segir manni að þær haldi sig saman á meðan þær eru litlar
Þessi hrygna af gotfiska tegund sem ég þekki ekki kom á háfinn, ef ég hefði náð hæng hefði verið meiri möguleiki að greina hvaða tegund þetta er og síðan er hitt vandamálið að lítið er skráð enn sem komið er hvaða tegundir eru í Úrúgvæ sem er bæði eitt það besta við að veiða þarna en á sama tíma eitt það versta ef maður vill vita hvaða tegundum maður hefur náð
Stæðilegur vatnagróður óx upp úr lóninu á stilkum með stór laufblöð og höfðu stórir sniglar notað stilkana undir hrognaklasa, þægilegast væri að kalla þessa snigla eplasnigla þar sem lögun og stærð minnir á þá en endalausar tegundir eru til af sniglum og ekki hægt að henda þeim öllum undur eitt nafn
Auðvitað er alltaf eitthvað annað líf í kringum okkur í þessum ferðum og þá sjaldan sem Drekaflugur stoppa þá tek ég mynd en þessi stoppaði næganlega lengi fyir nokkrar myndir, á innfelldu myndunum má sjá litlar krúsir sem eru vespubú og síðan hrúgu af maurum sem voru undir spítu sem ég lyfti upp í leit að sporðdrekum
